嚟到第二集《鋒味前奏》,主理人謝霆鋒繼續孖住火火同劉翁教大家煮菜。今集霆鋒就教大家整「吳彥祖黃芽白沙律」,當霆鋒一話要用黃芽白整沙律,火火同劉翁即刻露出嫌棄神情話:「黃芽白可以做沙律嘅咩?」霆鋒解釋呢道菜其實係由吳彥祖教佢整,火火即刻回應:「佢曉唔曉㗎?咪亂咁嚟啊!黃芽白攞嚟打邊爐㗎嘛!」又質疑生食黃芽白會有腥味,但當霆鋒完成沙律,佢哋兩個都搶住食,劉翁仲忍唔住話:「哇!得!」
三個人邊整沙律邊傾偈,今集播出嘅《鋒味》霆鋒同吳彥祖去希臘取景,火火問霆鋒希臘有咩好玩,霆鋒就話啲人好Chill,所有歐洲人都出奇地識嘆。之後又傾到歐洲嘅街頭騙案,劉翁問二人:「唔知你哋有無試過,歐洲會有人叫你Give me your finger,如果你真係俾咗隻Finger佢,佢就會捉實你隻手指不斷撟圈,跟住問你攞錢。」霆鋒就話自己都遇過呢種情況,然後佢就舉出中指,搞到火火同劉翁即刻爆笑問:「你走得甩咩?」霆鋒笑住答:「我跑得快。」瞬吓眼,沙律已經完成,霆鋒仲幫佢改咗個名,叫:「吳彥祖黃芽白沙律」。
火火問今集《鋒味》有咩重點,霆鋒話:「今季會去當地素人嘅廚房煮菜俾佢哋食。遇到好多神化小故事,但永遠呢啲小故事好動人,希望透過煮嘢食去交流。」劉翁就話呢啲係劇本都寫唔到,霆鋒表示認同,呢啲素人嘅小故事令佢大開眼界。