早前啟動的「音樂大童」企劃,一反英娛樂過往的選透形式,今次以網絡世界為「比賽重地」,而比賽分為「演唱大童組」以及「編曲大童組」,前者顧名思義是招募樂壇新聲音,後者則為發掘更多音樂製作人才而設。參加者只要演繹或改編與企劃同名主題曲《音樂大童》,拍攝並上傳演繹片段到指定網站,勝出者版本將派發到各大傳統及網上媒體平台,更有機會成為英皇娛樂專屬歌手及製作人!

日前三位歌手鍾舒漫(Sherman )、羅力威(LLV )及許靖韻( Angela )聯同網絡KOL笑波子、伍仔及Jil Ting 踩入K房為「音樂大童」造勢,六人分成兩隊,比拼20分鐘內揾到最多人報名參賽為之勝出。由鍾舒漫、笑波子及Jil Ting組成的一組率先出發,途中Sherman發現有K迷點唱自己作品,於是即入K房現身打招呼,並邀請對方試唱《音樂大童》,實測有無潛力做歌手。大家見到Sherman時確實又驚又喜,而經過Sherman一翻遊說後都報名參加,不過就有參賽者不停反問「係咪認真架?」仲一度以為拍攝整蠱節目,場面搞笑。最終限時內有六名參賽者報名,Sherman分享:「我地起初大部人都好怕醜,不過大家最後都報名參加,我睇到佢地心入面有熱血一面。」

而羅力威、許靖韻則夥拍伍仔成為另一組,許靖韻自爆在活動前已不停幻想K房內情況,當被反問現實同幻想有冇出入,她就笑笑口說:「估唔到大家咁斯文,雖然我未至於係咪霸,但唱K好少坐定定鍾意周身郁,有時仲會跳舞。」而要數當日最威必數羅力威,原來粉絲們一早收到風,所以拉大隊坐滿成間K房。當羅力威現身時粉絲熱烈歡呼,現場變成粉絲見面會。羅力威自然好識做,瞓身與每位粉絲握手、合照,仲親自點歌同大家合唱!當他幽默地同粉絲講:「如果你地有電郵,不妨報名參加《音樂大童》。」不消一刻就成功令粉絲們報名,贏得今次大比拼。